Forsi è l'incantu di sta notti stiddiata
o u chiaruri di sta luna argintata
fattu stà ca sintu bedda na vuci
ca mi trascina ò timpu felici.
Mi cunnuci ò timpu 'i na vota
quannu natali jera festa, divota
vvu l'occhi dò timpu mi viju carusu
ccu me Pà vicinu ò prisepi, giuiusu.
Taliu a me Pà, che assittatu di latu,
mpasta muddichi di pani 'ndurutu
pi fari precisi Madonna e Bambini
i pastura, ca po metti in camminu.
riviju a grutta, cunzata a la bbona
u sampugnaru cuntentu ca sona
i muntagni cci a nivi fatt 'i farina
me Mà ca li conza ccu a carta vilina.
E nmizzu a sti prisenzi oramà pirduti
vivu stizzi di timpu mà scurdati
ma lestu sti mumenti si nni vannu
e ristu ccu l'arsura d'ogni jornu-
Ora.nnò prisepi, ci su tanti cosi§
tutti biddi nnè vitrini, luciusi
ma nà menti aiu chiddi d'allura
e u pinzeri và a Madfonna e pastura
cunzati ccu muddichi di pani
'mpastati... 'nduruti

Iu vulissi àviri
i rriti cchiù grànni,
e piscàri nné màri funnùti
pàroli d'amùri.
E ppi fàriti nà curùna;
vulissi vulàri
nnò cìlu azzùlàtu,
p'acchiappàri i pàroli cchiù beddi.
Ma nunn' aiu ne rriti né àli
sùlu, ti pozzu dàri:
i pàroli sincéri, squagliàti nill'òru,
no chiddi àvani ca sannu di vìntu.
Tu ppi cangiu:
portàmi i pàroli ca sònanu
cumu i cianciàni e fannu scurdari
i pèni' nsemula a chiddi sìreni,
ca piacinu.
Ju mméci, certi vòti
aiu cumpagni i pàroli mmàstini,
ca strammijanu i negli;
mpiduglijanu i gammi.
E mmùcca m'arrestanu chiddi
vintusi, ca scummoglijanu càsi.
Ma Tu u saij:

TAVULATA DI NATALI

Natàli; chi sirata:
chiòvi e sùgnu mìsu d'àrrì a finèstra.
I gocci, sbattinu nnè vìtra
e si rumpinu in tanti sbrizzi culurati.
Talìju i stràti vagnàti, e u pinzìri,
vòla luntànu, nn'àrrì.
Puru tànnu chiuviva
e c'èra frìddu ppì Natàli,
ma c'u sintìva.
Quànti cùrsi, nni dda vanèdda china 'i zòtti,
unni c'azzaccanijàva
cu i scàrpi... spirtusàti,
e nnè manu luci-luci picuraru.
Chi jorna jèranu chìddi, biddi, scanzùnati.
Ma... unni siti, òra
parìnti e cumpàgni di na vòta?
Unni a passàti sta sànta nòtti di Natàli?
Quàntu làrgu c'è nnì sta tàvula.
Tànnu, i sèggi unn'abbastavanu mài.
Jèramu assài a jucàri a munachìddu, (1)
e ògni vòta ca dàva i carti Me-Pà,
sopiddu cùmu jèra, vìnciva
sèmpri cu diceva jiddu. Me-Pà...
quant'àvi ca nun c'è cchiù,
e comu stàva càllu nnè sò vràzza.
Jèramu assài, a jucàri a munachìddu
e i sèggi unn' abbastavanu.
Stasìra, mmèci c'è làrgu nnì sta tàvula,
e frìddu, tròppu frìddu ntì stu còri.

1) Gioco di carte in cui uno degli assi
veniva chiamato "munachiddru" aveva più
valore degli assi degli altri semi

Sùla, 

cùmu na còsa ca nun cùnta
mi lassàstivu, nni sta cònca sdisulàta
tra stu silènziu ca mi vànnija dintra u pìttu.

All'èbbica, parò tùtti:
carusi, vagunara e picunera;
mi sucàstivu u sàngu
mmìzzu a sti vanèddi nzurfaràti.

E ch'era allègra a jurnàta
di la ggiùsta quannu
ch 'è sacchètti chin'i gràna,
si cantàva:" Lu sabbàtu
si chiama allègra còri". (1)

Ju vànitusa comu i sciuri
ntà stasciùni cuntènta mi sintìja,
a dàrivi u manciàri ppa famiglia.

Ora mmèci,
pàssu iurnàti i na manera
e nnà campagna ca sàpi di gramìgna,
nun c'è n'àrma ca sùda a la virsùra.

Camina lìntu u sùli nnò vaddùni
e quànnu tracodda a la muntàgna
m'arrizzìttu u jàzzu ppa nuttàta.
Ppi linzòla ci mittu l'amàrizzi
ppi chjumàzza na curùna di pinzera.

E ccu sta lùna, c'acchjana lènta,
zzuccarina in mènti, carùsi, mi vinìti.
Mèntri u lùstru di na citulèna
ca s'adduma,
m'arriporta: sirèna... signurina.

1) stornellata siciliana