LA STORIA DI CICCIU ULIVIERI (piccola parte)
Orazio Stranio
testimonianza di Orazio Strano raccolta nel 1954 a Riposto (CT) da Alan Lomax (famoso americano raccoglitore di
canti di cantastorie) e Diego Carpitella.
Il cantastorie esegue in questa circostanza La storia di Cìcciu Ulivieri, una tragica
vicenda di sangue che vede il crudele protagonista sparare ai membri di un’intera famiglia per vendicarsi
di un debito non saldato (uccide il padre e la figlia minore e ferisce la madre e il figlio).
Il componimento è articolato in sestine incatenate, dette dai cantastorie ntruccati (dove l’ultimo verso di una
strofa rima col primo della seguente), e presenta il tipico andamento in cui si interrompe il flusso poetico
intercalando brevi commenti in prosa
tratto da "La musica di tradizione orale" (coll. di S. Bonanzinga)
Non si fici pi nnenti arraggiunari
l’omu malvaggiu e cchinu di fururi,
a la cchiù nica si misi a guardari,
a Graziedda ca parìa n’amuri
ca di la matri stava fora manu
quantu quaranta metri cchiù luntanu.
A fìgghia stava cchiù luntanu picchì
quannu ci sparau a sò patri scappau
picchì si scantau.
Pigghiau la mira lu malu cristianu
a la fìgghia cu n’òcchiu tantu finu,
ci spara e la firìu a lu vilicanu
e p’ammazzalla ci currìu vicinu,
Raziedda si ci misi addinucchiata
prigannu tantu a dd’arma dispirata.
A figghitta si ci misi addinucchiata e ci dissi:
«Don Cìcciu, chi v’a’mu fattu nuatri?
Me patri seimilaliri vi duna». A matri dissi:
«Assassinu, non vidi a dd’anima innoccenti comu la prega».
Ma l’assassinu, signori, non si fici arraggiunari.
Ma lu malvaggiu mmiscau na pidata
e l’abbattiu dda nterra nta na vota,
dopu ci duna na gran pugnalata
ca la fìgghia si fici côta côta,
non suddisfattu poi la pidiau
finu ca morta nterra la lassau.
Taliati, signori, comu l’assassinu la lassa morta dda nterra.
A matri dissi: «’Ssassinu m’ammazzau a fìgghia…
Ah! – dissi – Patri eternu e chi nenti vu’ viditi».
La matri dissi: «A fìgghia m’ammazzau
che nenti vu’ viditi Santu Diu?»
Mentri forti lu fìgghiu s’abbrazzau
e l’autri ddui ad idda li strincìu.
Facennu vuci: «Basta, non sparati,
a chisti figghi cchiù non mi mmazzati.»
«Don Cìcciu – dissi – basta! Ci sparasti a me maritu
– dissi – m’ammazzasti a fìgghia, ora basta!
Don Cìcciu vi pregu, pi l’amuri di Diu siti cundannatu a l’infernu!»
L’assassinu l’aricchi avìa ntuppati
e non sinteva ddi grida tantu acuti,
diavuli teneva ‘ncupparati
dintra lu corpu sò cchiù ‘mpatrunuti,
pi chistu piatà nun nni sinteva
di na dulenti matri ca chianceva.
Signori, non sinteva a ‘na povira matri
ca chianceva lacrimi di sangu… macchì,
signori, era comu viditi, una belva.
A lu putenti Cifaru pareva
di comu iddu li gìgghia si ‘ncucchiava,
pirchì ancora troppu sdegnu aveva
contra a Maria e li figghi sparava,
senza pinsari nenti lu furfanti
firìu ‘u fìgghiu e a matri sull’istanti.
Orazio Strano, caposcuola e autorità indiscussa, è stato il più famoso cantastorie della Sicilia orientale; è considerato da molti il padre dei cantastorie siciliani, era paralitico ma questa sua condizione non gli impediva di spostarsi di città in città; si esibiva seduto sul carrozzino accompagnandosi con la sua inseparabile chitarra e alle volte con un mandolino.
|
