CHIUMMA DI CHIANTU PISA STA BBILICI

Dintra lu sonnu di lu mari
cu lu cori arripizzatu
e li varchi fermi, annacati di lu ventu,
t’amu accussì forti
e ti talìu pi l’urtima vota,
ferma, cu l’arma mmucca e l’affuddatu sciatu.
Na trazzera e lu curtigghiu unni iucava,
la scupa vecchia ngapu na bbalata di mmarmu,
un vacili ruttu e na scarpazza mmicchiuta.
Vuci di picciliddi e jinocchia scurciati,
li facci russi di focu, nzivati,
li timpuliati,
li iurnati accussì ni passavanu,
mmezzu sciddicusi strati
a du a du li scaluna santavamu
e li trizzi ni la facci mi sbattivanu,
ni li cannarozza lu cori quasi quasi m’arrivava.
Li firrati arrugginuti e li finestri chiusi,
lu bbarcuni unni la matri stinniva li canzi,
e l’acidduzzi cantarini si pusavanu tisi tisi.
Fumu di sicarru nisciva di lu purticatu,
la coppula ntesta lu patri sempri purtava.
Li roti di carrettu appinnuti ni li mura scrucchiulati,
lu viddanu ca vanniava, passava cu la mula
e la bbilanza mmani.
E sentu ancora lu sciauru di l’aranci
e haiu nnavanzi l’occhi
li mani nivuri, spardati di lu travagghiu.
Li gugli e li scarpi di notti,
la bbracera astutata,
li filinii ni li seggi,
li cuddureddi ni lu panaru,
li canti di li surfarara.
L’arbuliddi crisciuti, sempri uguali la funtana.
Chiumma di chiantu pisa sta bbilici
e l’arma mi pisa nenti
picchì ti staiu lassannu, Sicilia mia,
e senza tìa, tutti vantri,
iu nun sugnu cchiù nenti.

PARADISU, RESTI PI MMIA,
FOGLIA DI RRACINA NGAPU L’ACQUA

Paradisu era sta foglia di rracina ngapu l’acqua
ca pariva vasceddu fermu,
si cantava e a lu suli s’arridiva.
Nenti mancava.
Ogni tempu avia a so stagiuni,
aranci pinnuliavanu di li rrami,
fastuchi ni li sacchi chini,
l’amuri facci a facci nasciva,
ci si vrigugnava e l’omu sutta la porta,
la carusa aspittava.
Paradisu era sta foglia ngapu l’acqua,
quannu l’amicizia era na mangiata di pani cunzatu
e a tutti l’uri la porta aperta truvava.
Li jucati a mmucciarè,
li pidaliati e li caduti.
Mmezzu li strati si crisciva,
picca era la superbia e assà li risati.
Paradisu era sta foglia ngapu l’acqua,
quannu ancora lu travagghiu abbunnava
e un figghiu sistimatu, lu patri si truvava.
E cu l’anni Purgatoriu addivintà
sta foglia di rracina ngapu l’acqua,
spirtusata, ncumincià a calarisinni.
Era troppu lu pisu ca purtava,
figghi e valigi pronti a la nova firmata.
E occhi unn’arristaru cchiù pi chiangiri,
nuddu cchiù cantava.
Lu travagghiu ncumincià a scarsuliari.
A lu tempu livaru puru li so stagiuni,
lu suli d’aprili, lu caluri.
L’amuri un si fa cchiù ddisiari,
omini rimbambiti e fimmini ca la sannu longa,
si va pirdennu puru lu sensu di na vasata,
di lu russuri d’amuri.
Paradisu, resta pi ‘mmia,
sta foglia di rracina ngapu l’acqua,
la talìu di luntanu,
ma lu pani mi nega e di suli un si campa.
Mi strazzassi tuttu lu cori,
ma lu pani, no, un mi l’avivatu negari.

SICILIA FODDI, SICILIA LUNTANA

Friscura di maìu 
asciucata a li setti di matina, 
la cicàra di latti pronta 
e la vasata dunci 
ni la scapiddata testa. 
Pampini sicchi d’ulivi caduti ‘nterra, 
‘nnavanzi la porta 
e sciauru di lumii, 
lu suli ca agghiurnava, 
lu trenu ca passava, 
lu tempu ca m’abbrazzava. 
Avìa cca tuttu l’amuri,
amuri miu, me patri e me matri,
amuri miu, li me frati.
Risati di l’amici avìa, 
lu mari arraggiatu, 
beddu, foddi, 
u mari miu mi mangiava l’occhi. 
Ma la sorti è na buttana, 
la mala sorti
di aviri arti di pinna e un putirisi
a sula campari.
Di chiangiri cchiù un mi veni,
ma di turnari sempri ni tìa, 
Sicilia d’amuri, stu spinnu, 
ogni secunnu mi torna. 
E si luntana, ancora pi assà avissi a ristari, 
na cosa sula addumannu: 
un jornu, chiusi l’occhi
na culla da matri
vulissi arripusari 
e squagliari cuntenta 
sutta l’ummira tò
Sicilia foddi
Sicilia luntana.

SULU RADICHI 

Ti sciauru, 
ni sta notti d’estati, 
sutta un tettu di stiddi bianchi 
e li tenni ballerini, cumpagni du ventu leggiu:  
a vita è ora 
e ‘ncastru tutti li pinsera. 
Pruvavu, a stariti luntana,
fu na granni imprisa…
li radichi mi vulivanu spiccicari 
ma l’amuri ca mi detti Diu 
è cchiù forti di ogni mancanza 
e attaccata a ttìa, mi fici ristari. 

Ti vasu, 
ni sta notti d’estati,
‘ngapu na manu eterna di sabbia fina 
e paroli nun n’haiu e parole non ho
picchì si tuttu lu me sciatu, 
ca parti dill’arma e respiru, ogni secunnu, 
si ddu disìu tantu prigatu. 
Ddi occhi nivuri su comu stu cielu curcatu 
ca s’inchiovanu n’testa e arripusari un mi lassanu. 

E u cori sbatti n’pettu, senza paci,
comu n’addevu ca sta criscennu 
ma un sapi ancora natari. 

Sicilia, casa mia, 
passìari di chiazzaroli, lambretti di cipuddari
e passuluna ni li barracchi di mercatu, 
lu sciauru ca fa ‘mbriacari. 

Pirduta e sula mi sintiva pi ddi vaneddi 
unni n’sicilianu nun sintiva cchiù parlari: 
muriri ccà mi fannu, pinsavu, 
la borsa di grana, china china, 
vistita di lussu, vestiti di lusso,
tuvagli di sita 
e lu cori svacantatu.
Arridiri cchiù nun sapiva.
Nun vidiva cchiù lu mari e tutti li siciliani, 

SOLO RADICI

Ti annuso,
in questa notte d’estate,
sotto un tetto di stelle bianche
e le tende ballerine, compagne del vento leggiadro:
la vita è ora
e incastro tutti i pensieri.
Ho provato, a starti lontana,
fu una grande impresa… 
le radici volevano staccarmi
ma l’amore che mi ha dato Dio
è più forte di ogni mancanza
e attaccata a te, mi fece restare.

Ti bacio,
in questa notte d’estate,
sopra una mano eterna di sabbia fine
perché sei tutto il mio fiato,
che parte dall’anima e respiro, in ogni secondo,
che parte dall’anima e respiro, in ogni secondo,
sei quel desiderio tanto pregato
Quegli occhi neri sono come questo cielo coricato
che s’inchiodano in testa e riposare non mi lasciano

E il cuore sbatte in petto, senza pace,
come un bambino che sta crescendo
ma non sa ancora nuotare.

Sicilia, casa mia,
passeggio dei piazzaioli, lambrette dei cipollai
e olive nere nelle bancarelle di mercato,
l’odore che fa ubriacare.

Dispersa e sola mi sentivo per quelle stradine
dove in siciliano non sentivo più parlare:
morire qui mi fanno, pensai,
la borsa di soldi, piena piena,
vestiti di lusso
tovaglie di seta
e il cuore svuotato.
Ridere più non sapevo.
Non vedevo più il mare e tutti i siciliani.