AMMULA FOBBICI E CUTEDDA
testo: Giuseppe Cardello 
musiche: Salvatore Amore

Arriva da luntanu supra nu mulu staggiunatu
arriva cu lu suli ni la vecchia cuntrata
accatta ferru vecchiu e robba uramai pusata
pi lu jornu ca nasci varcannu lu passatu

Gira pi li strati a lu scrùsciu di cianciani
ni la storia centu pezzi di li granni avvinturi
vannìa li sicreti di re e d’imperaturi
pi ‘n saccu di carrubbi e tabaccu ni li mani

Ha canusciutu li majari di lu tempu c’ha vinutu
canta la gioia d’o munnu quannu crìsciunu li uri
chianci cu li soddi li lamenti d’o signuri
pi l’antichi petri si ferma alliggirutu

Ni cunta lu Ddiu di ciumi e aquili gicanti
Orlannu eroi pazzu prudiggi d’oru finu
stiddi raccamati e li gesta d’Astolfu palatinu
pi la luna a cavaddu d’Ippogrifu vulanti

Arriva da luntanu supra nu mulu staggiunatu
arriva cu lu suli ni la vecchia cuntrata
accatta ferru vecchiu e robba uramai pusata
pi lu jornu ca nasci varcannu lu passatu

E quannu oggi stancu lu quarteri si ritira
e li strati si perdunu ni lu scuru di la sira
resta ancora la mà vita o ricordu d’o so’ cantu
cerca ancora la so’ varba ni la chiazza di l’incantu

“Ammula fobbici e cuteddaa...”