ROSA SI FICI SPUNTARI I SPINI
E' una piccola parte della storia (cantata come facevano i cantastorie antichi con tanto di cartellone) della vita di Rosa Balistreri.
Mel Vizzi ed il suo gruppo formato da Marco Angelo Zimmile e Cinzia Marotta danno il meglio di loro nell'esporre la vita della folksinger licatese Rosa Balistreri.
Introduzione:
Tutti o vintun' i marzu....nàscinu i primaveri...
tànnu nascìu Rusiddra a Ballistreri...
signal’ i primavera ppi’ natura...
cc'u la rigina Rosa, su' li sciura!...
Rusiddra nun campau na vita 'ntera...
si fici a malapèna la stasciuni...
prima di la virnata...gia' nun c'era...
a sittemmri 'unn' arrivau a lu vintunu!
'o vinti salutàu tuttu u munnu...
mancu cci misi pedi nill’ autunnu !
°°°°°
Dopu nov’anni ca a Guerra finìa…
povira terra ca vèna a trannìa !
Dopu lu ‘mbèrnu ‘un ci fù Primavera
ni sta Sicilia ca sciùra ‘un’ci’nn’era…
Ma o Vintisètti ‘gnòrnu di Marzu
ni chìssu misi ca dici ch’è pazzu
a lu vintùnu spuntà a Primavèra
…sscìu na rusìddra ‘a la cantunèra.
A cantunèra è ‘mpàcciu a lu mari
e la rusìddra si misi a cantari…
‘Mmènzu la fami sciùra ‘un’ci’nn’era
…ma ccu na Rosa si fa primavera !
Poviru sciùri ni ddrà malaterra !
Dopu la Prima scuppià n’àttra Guerra !
Poviru sciùri ! Ahi! Cchi distinu !
Stari ciantatu ‘intr’on malujardìnu !
Poi ‘pprufittàru a la vicarìa
di na rusiddra ca vèna a trannìa…
…e ppi’ difènnisi di saracìni
Rosa si fici spuntàri li spini !
Rosa è nu sciùri ca nu’ stà fermu…
càngia jàrdinu e si ciànta a Palermu…
ma trova sempri la tirannìa
ca la riporta a la vicarìa.
Ma quant’è nìvura ss’a Primavera
ca tena a Rosa ‘ittàta ‘ngalèra…
quantu su tinti ssi’ saracìni
…tantu ca a Rosa cci’allònganu i spini.
E lassa puru ssu’ malujardìnu…
…piglia lu trenu ca cangia distìnu
…ed è a Firenzi ca s’ arripòsa
…mentri ca canta e sbòccia la rosa.
Vannìa frutta la virduràra…
…e a tempu persu a chitarra s’ampàra…
ccu Cicciu Busàcca… ‘Gnàzziu Buttitta…
…e Dario Fò ca la parti cci’à scritta…
U primu discu, u successu, u Teatru…
cci fici sscòrdiri lu munnu latru…
Ma la zizzània ‘rrivà nu jardìnu
…e ora ppi’ Rosa arrè vòta u distìnu !
Dò cutiddràti nun fòru pìcca:
so’ soru mora …e u so’ patri si ‘mpìcca !
Maludistìnu ! Duluri e morti !
‘ssicùtanu a Rosa ca canta cciò forti !
…e quannu persi puru u Pitturi
pruvà a murìri senza l’amuri !
da Primavera, ‘a Stasciùni, a lu ‘Mmernu
…manca l’Autùnnu, …e u và’ccèrca a Palermu !
Di la Stasciùni ….passa a lu ‘Mbèrnu !
…manca l’Autùnnu, …e u và’ccèrca a Palermu !
Ma a la finùta da Stasciunàta
nun pòtti fari mancu na pidàta !
…nun pòtti tràsiri ni’ll’Autùnnu:
…‘o vinti Sittèmmri …lassàu stu mùnnu !
Nun pòtti tràsiri ni’ll’Autùnnu:
…l’annu Novanta lassàu stu mùnnu !
Ma ni lassàu na Primavera
fatta di sciàvuru ca prima ‘un c’era…
…e ni lassàu na pocu di spini…
ca ancora pùnginu li malandrini !
Rosa lassàu na pocu di spini…
ca ancora pùnginu li malandrini !
Testo di Mel Vizzi- In questa versione(Teatro Re Licata, 27 Marzo ’14) :
Arrangiamento musicale Marco. A. Zimmile-
Interpretaz: Mel Vizzi, Cinzia Marotta e Marco A. Zimmile.
( 23 -02-2014 )
