I' NI LU SONNU LA VULIA ACCHIAPPARI

I’ ni lu sonnu la vulìa acchiappari;
iddra passava, e ardenti ni dicìa:
“Dai ca ti scappu! Curri! M’ha pigliari”!
L’assicùtu, e dicénnumi currìa:
“Nun circari li cosi terra-terra:
fùssiru di vaddruni o di la serra.

Stenni li mani sempri e sempri all’antu
e l’occhi ’n celu cu lu tantu arduri;
veni senza trimuri e senza scantu:
su’ ccà li cosi boni e di valuri.
Si tu ascunti la vuci di la luna,
granni-granni sarà la to furtuna”.

Pirchì la luna ’n sonnu cumparìa
e addrumava li chiani e li sbalanzi?
Pirchì era carusazzu, iddra vinìa?
Pirchì era tempu di disiddri e spranzi?
Ora ddru tempu me beddru chi fu,
ormai passà, e nun mi torna cchiù.

Capaci ca viniva pi daveru
ddr’immàgini ammantata di magia
sutta spécia di luna e di misteru.
Ma sì vinìa, cu dissi ch’era dìa:
la megliu di li megliu, ca a lu munnu
megliu nun c’è, mancu si giri ’n tunnu?

Capaci emmeci ca la fantasia
ddrà si stampava ni la gran lucerna:
disiddru chi figura si facìa
intra ddra beddra lustrurata eterna.
Capaci ca lu spìritu carusu
è un poviru e nnuccenti malu llusu.

IO NEL SONNO BRAMAVO D'ACCHIAPPARLA

Io nel sogno bramavo d’acchiapparla;
essa passava, e ardente mi diceva:
“Dai che ti scappo! Corri ad afferrarmi! “
La inseguivo e dicendomi correva:
“Non cercare le cose giù di terra:
che siano a fondo valle o sulla vetta.

Stendi le mani sempre e sempre in alto
e gli occhi al cielo con il tanto ardore;
vieni senza tremore né spavento:
son qui le cose buone e di valore.
Se tu ascolti la voce della luna,
grande-grande sarà la tua fortuna”.

Perché la luna in sogno mi appariva,
e accendeva le piane e i precipizi?
Perché ero giovanotto, lei veniva?
Perché era tempo di speranze e brame?
Ora quel tempo mio bello che fu
è già passato e non mi torna più.

Può darsi che venisse per davvero
quell’icona ammantata di magia,
sotto specie di luna e di mistero.
Ma se venne, chi disse che era dea:
la migliore del meglio, che nel mondo,
meglio non c’è, manco se giri in tondo?

Può darsi invece che la fantasia
là si stampava nella gran lucerna:
bramosia che figura si faceva
in quella bella lucentezza eterna.
Può darsi che lo spirito fanciullo
sia povero e innocente mal illuso.