NUN CANTU CCHIU'

Mi sientu sulu,
un papanzicu addummisciutu,
nun cantu chiù…
pi cu a cantari?

Sugnu sulu…..
nun mi vuogli custirnari.
Cantanu l'atri
in miezzu a sta campagna
cardiddri e un merlu
ca cerca la cumpagna,
canta lu vientu
in miezzu a la vaddruni,
e lu viddanu
ca è stancu e nun ni po
chiuni…..

Io nun cantu,
pi cu a cantari? mi sientu sulu
com'un cani vastuniatu,
senza patruni
a pitriati assicutatu…un
friscalettu ca nun po friscari
na scupetta rutta
ca nun po sparari

Io nun cantu chiù,
pi cu a cantari?

mi vinniero no pi trenta
ma pi tri dinari,
mi lassaru sulu
ni l'acqua di lu mari….
e lu sapivanu
ca io nun mi fidia a natari.

No, nun cantu chiù,
pi chi a cantari?
arrassativi tutti
ca nun mi vogliu
far tuccari, staiu muriennu
e niente puozzi fari…..

Nun vogliu a nuddru
non mi faciti
bistimmiari…..

Lu vo capiri
ca nun puozzu
chiù cantari?