“U PIZZINU”

La vita èni comu un pugnu ciusu,
cinu di ricordi e di suspiri
l’ultimu sciatu, è troppu dulurusu
e nun si sapi comu va affiniri.
A la gente di Licata
mannu a tutti stu bigliettu
comu fussa n’carzarata
e di iddi a grazia aspettu.
Iu, vi scrivu di tantu luntanu
senza un sbrizzu dall’agria
ora che mi trema a manu
sentu tanta nustalgia.
Stu pizzinu che iu, scrivu
mi lu portu d’intra u cori
mentre ancora sugnu vivu,
e lu sciatu nesci di fora:
Salutatimi lu suli
quannu affaccia la matina,
quannu trasa ni vaneddi
du quarteri da marina.
Salutami lu mari
puru quannu è n’timpesta
anche seddu fa scantari
quannu aisa la sò cresta.
Salutami la luna
che mi taliava da tirrazza
quannu fani la lustrura
e illumina la ciazza.
Salutatimi u paisi,
li cuntrati tutti interi
vi lu dicu senza offisa,
propriu tutti li quarteri.
A l’amici di Licata
iu, mannu stu bigliettu
pirchì sacciu ch’è estasiata
e che prova tantu affettu.