A LATU A TIA

Quannu ‘mbrazza a dd’occhiuzzi mi cunnuci
cè n’arba chi lu suli nun lu voli,
chiddu chi assazzu mi pari chiù duci
e batti lingua dunni denti doli.

Quannu m’arriva l’ecu di dda vuci
tu mi levi di n’vucca li paroli,
tuttu ‘nzemmula ammucci stiddi e luci
e dintra na carizza mi cunzoli.

Sí duci comu nespula matura,
na rrappa di racina a pinnuluni,
lu suli ‘ncapu l’unni mentri scura
e nná lu focu l’urtimu tizzuni.

Cu un sciusciu astuti l'anzia e la paura
e si vidi na larma e ti ‘nnadduni
porti nná l’orizzunti li culura
e manu nná la manu l’astaciuni.

Cattigghi lu me cori a lu ‘mpruvvisu,
quannu mi dici chi vulissi tuttu
l'amuri finu a l’urtimu surrisu,
pi tèniri a l’additta un Munnu ruttu.

A latu a tia ddu ciávuru chi haiu ‘ntisu
è strattu di puisía chi duna un fruttu,
quannu ammucci un sigretu ed eu l’abbisu
e dd’alitu di vita mi l’agghiuttu.

ACCANTO A TE

Quando in braccia a quegli occhi mi conduci
c’è un alba che il sole non lo vuole,
quello che assaggio mi sembra più dolce
e batte lingua dove dente duole.

Quando mi arriva l’eco di quella voce
tu mi levi di bocca le parole,
all’improvviso nascondi stelle e luci
e dentro una carezza mi consoli.

Sei dolce come nespola matura,
un grappolo d’uva a penzoloni,
il sole sopra le onde al tramonto
e nel fuoco l’ultimo tizzone.

Con un soffio spegni l’ansia e la paura
e se vedi una lacrima e te ne accorgi
porti nell’orizzonte i colori
e mano nella mano l’estate.

Solletichi il mio cuore all’improvviso,
quando mi dici che vorresti tutto
l’amore fino all’ultimo sorriso,
per tenere in piedi un Mondo rotto.

Accanto a te quell’odore che ho sentito
è essenza di poesia che da un frutto,
quando nascondi un segreto ed io l’indovino
e quell’alito di vita me lo inghiotto.